13-13 ਸੰਸਥਾ ਫਗਵਾੜਾ ਵੱਲੋਂ ਇਸ ਮਹੀਨੇ ਵੀ ਲਗਾਇਆ ਗਿਆ 13-13 ਲੰਗਰ

ਫਗਵਾੜਾ, 12 ਮਈ (ਰਮਨਦੀਪ) ਸ੍ਰੀ ਗੁਰੂ ਨਾਨਕ ਦੇਵ ਜੀ ਵੱਲੋਂ ਚਲਾਈ ਪ੍ਰਥਾ ਨੂੰ ਅੱਗੇ ਤੋਰਦੇ ਹੋਏ 13-13 ਸੰਸਥਾ ਫਗਵਾੜਾ ਵੱਲੋਂ ਪ੍ਰਧਾਨ ਮੋਹਨਜੀਤ ਜੌੜਾ ਦੀ ਅਗਵਾਈ ਵਿਚ ਇਸ ਮਹੀਨੇ ਵੀ 13-13 ਲੰਗਰ ਲਗਾਇਆ ਗਿਆ।ਜੌੜਾ ਜਿਊਲਰਸ ਪੈਲੇਸ ਬੰਗਾ ਰੋਡ ਫਗਵਾੜਾ ਵਿਖੇ ਲਗਾਏ ਗਏ 13-13 ਲੰਗਰ ਵਿਚ ਆਮ ਆਦਮੀ ਪਾਰਟੀ ਐੱਸ.ਸੀ ਵਿੰਗ ਦੇ ਜ਼ਿਲ੍ਹਾ ਪ੍ਰਧਾਨ ਸੰਤੋਸ਼ ਕੁਮਾਰ ਗੋਗੀ ਸਾਥੀਆਂ ਸਮੇਤ ਉਚੇਚ ਤੌਰ ‘ਤੇ ਸ਼ਾਮਿਲ ਹੋਏ। ਇਸ ਮੌਕੇ ਸੰਤੋਸ਼ ਕੁਮਾਰ ਗੋਗੀ ਨੇ ਸਾਥੀਆਂ ਅਤੇ ਸੰਸਥਾ ਦੇ ਮੈਂਬਰਾਂ ਸਮੇਤ ਆਪਣੇ ਕਰ ਕਮਲਾਂ ਨਾਲ ਲੋੜਵੰਦਾਂ ਨੂੰ 13 ਰੁਪਏ ਵਿਚ ਆਟੇ ਦੀਆਂ ਥੈਲੀਆਂ ਵਿਤਰਤ ਕੀਤੀਆਂ। ਉਨ੍ਹਾਂ ਸੰਸਥਾ ਵੱਲੋਂ ਹਰ ਮਹੀਨੇ ਕੀਤੇ ਜਾਂਦੇ ਉੱਦਮ ਦੀ ਸ਼ਲਾਘਾ ਕਰਦਿਆ ਕਿਹਾ ਕਿ ਲੋੜਵੰਦਾਂ ਦੀ ਮਦਦ ਕਰਨਾ ਪੁੰਨ ਦਾ ਕੰਮ ਹੈ ਤੇ 13-13 ਸੰਸਥਾ ਵੱਲੋਂ ਹਰ ਮਹੀਨੇ ਕੀਤੇ ਜਾਂਦੇ ਇਸ ਨੇਕ ਉੱਦਮ ਦੀ ਜਿੰਨੀ ਸ਼ਲਾਘਾ ਕੀਤੀ ਜਾਵੇ ਉਹ ਘੱਟ ਹੈ।13-13 ਸੰਸਥਾ ਵੱਲੋਂ ਸੰਤੋਸ਼ ਕੁਮਾਰ ਗੋਗੀ ਨੂੰ ਸਨਮਾਨਿਤ ਵੀ ਕੀਤਾ ਗਿਆ। ਸੰਸਥਾ ਦੇ ਮੈਂਬਰ ਨਰੇਸ਼ ਭਾਰਦਵਾਜ਼ ਨੇ ਸੰਤੋਸ਼ ਕੁਮਾਰ ਗੋਗੀ ਦਾ 13-13 ਲੰਗਰ ਵਿਚ ਪਹੁੰਚਣ ‘ਤੇ ਧੰਨਵਾਦ ਕਰਦਿਆ ਕਿਹਾ ਕਿ ਸੰਸਥਾ ਵੱਲੋਂ ਹਰ ਮਹੀਨੇ ਦੀ 13 ਤਾਰੀਖ ਨੂੰ 13-13 ਲੰਗਰ ਲਗਾਇਆ ਜਾਂਦਾ ਹੈ ਪਰੰਤੂ ਜ਼ਰੂਰੀ ਰੁਝੇਵਿਆ ਕਾਰਨ ਇਸ ਵਾਰ 12 ਤਾਰੀਖ ਨੂੰ ਇਹ ਲੰਗਰ ਲਗਾਇਆ ਗਿਆ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਸੰਸਥਾ ਵੱਲੋਂ ਭਵਿੱਖ ਵਿਚ ਵੀ ਇਹੋ ਜਿਹੇ ਉਪਰਾਲੇ ਜਾਰੀ ਰੱਖਣ ਦੀ ਵਚਨਬੱਧਤਾ ਦੁਹਰਾਈ।