ਪਠਾਨਕੋਟ ਦੇ 2 ਸਰਕਾਰੀ ਦਫਤਰਾਂ ‘ਚ ਧਮਾਕਾ, 1 ਮੁਲਾਜ਼ਮ ਜ਼ਖ਼ਮੀ

ਪਠਾਨਕੋਟ ਦੇ ਮਲਕਪੁਰ ਚੌਕ ਵਿਚ ਦੋ ਸਰਕਾਰੀ ਦਫ਼ਤਰਾਂ ਵਿਚ ਸ਼ਾਰਟ ਸਰਕਟ ਕਾਰਨ ਧਮਾਕਾ ਹੋਇਆ ਹੈ। ਧਮਾਕਾ ਇੰਨਾ ਖ਼ਤਰਨਾਕ ਸੀ ਕਿ ਛੱਤ ਨਾਲ ਲੱਗਾ ਪੱਖਾ ਵੀ ਹੇਠਾਂ ਡਿੱਗ ਗਿਆ। ਪਹਿਲਾ ਧਮਾਕਾ ਗੁਰਦਾਸਪੁਰ ਸੈਂਟਰ ਕੋ-ਆਪਰੇਟਿਵ ਬੈਂਕ ਵਿਚ ਹੋਇਆ।ਦੂਜਾ ਧਮਾਕਾ ਭੂਮੀ ਸੁਰੱਖਿਆ ਵਿਭਾਗ ‘ਚ ਹੋਇਆ। ਬੈਂਕ ਵਿੱਚ ਕਰੀਬ ਦੋ ਲੱਖ ਰੁਪਏ ਦਾ ਨੁਕਸਾਨ ਹੋ ਗਿਆ ਅਤੇ ਭੂਮੀ ਸੁਰੱਖਿਆ ਵਿਭਾਗ ਦਾ ਬਿਜਲੀ ਦਾ ਸਾਮਾਨ ਸੜ ਗਿਆ ਅਤੇ ਇਕ ਮੁਲਾਜ਼ਮ ਵੀ ਜ਼ਖ਼ਮੀ ਹੋ ਗਿਆ। ਬੈਂਕ ਮੈਨੇਜਰ ਜਤਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਬੈਂਕ ਵਿੱਚ ਅਚਾਨਕ ਧਮਾਕਾ ਹੋ ਗਿਆ ਅਤੇ ਬਿਜਲੀ ਦਾ ਸਾਰਾ ਸਾਮਾਨ ਇੱਕ-ਇੱਕ ਕਰਕੇ ਟੁੱਟਣ ਲੱਗਾ। ਅਜਿਹਾ ਸ਼ਾਰਟ ਸਰਕਟ ਕਾਰਨ ਹੋਇਆ ਅਤੇ ਬੈਂਕ ਦਾ ਕਰੀਬ ਦੋ ਲੱਖ ਰੁਪਏ ਦਾ ਨੁਕਸਾਨ ਹੋਇਆ। ਇਸ ਸਬੰਧੀ ਜਦੋਂ ਭੂਮੀ ਸੁਰੱਖਿਆ ਵਿਭਾਗ ਦੇ ਅਧਿਕਾਰੀ ਕੇਵਲ ਕ੍ਰਿਸ਼ਨ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਦਫ਼ਤਰ ਵਿੱਚ ਸ਼ਾਰਟ ਸਰਕਟ ਹੋਣ ਕਾਰਨ ਬਿਜਲੀ ਦੇ ਸਾਮਾਨ ਦਾ ਕਾਫੀ ਨੁਕਸਾਨ ਹੋਇਆ ਹੈ। ਉਨ੍ਹਾਂ ਦੀ ਡਵੀਜ਼ਨ ਦਾ ਇਕ ਮੁਲਾਜ਼ਮ ਵੀ ਜ਼ਖ਼ਮੀ ਹੋ ਗਿਆ ਹੈ। ਜਿਸ ਨੂੰ ਇਲਾਜ ਲਈ ਹਸਪਤਾਲ ਭੇਜ ਦਿਤਾ ਗਿਆ ਹੈ। ਇਹ ਸਾਰਾ ਨੁਕਸਾਨ ਸ਼ਾਰਟ ਸਰਕਟ ਕਾਰਨ ਹੋਇਆ ਹੈ।