‘ਪਿਛਲਾ ਉਮੀਦਵਾਰ ਧੋਖੇਬਾਜ਼ ਨਿਕਲਿਆ, ਪਰ ਇਸ ਵਾਰ ਨਹੀਂ’- ਜਲੰਧਰ ਰੋਡ ਸ਼ੋਅ ‘ਚ ਬੋਲੇ CM ਮਾਨ

ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਨੇ ਵੀਰਵਾਰ ਸ਼ਾਮ ਨੂੰ ਜਲੰਧਰ ਦੇ ਗੁਰਾਇਆ ਵਿੱਚ ਇੱਕ ਸ਼ਾਨਦਾਰ ਰੋਡ ਸ਼ੋਅ ਕੱਢਿਆ। ਇਹ ਰੋਡ ਸ਼ੋਅ ਆਮ ਆਦਮੀ ਪਾਰਟੀ ਵੱਲੋਂ ਪੰਜਾਬ ਵਿੱਚ ਚਲਾਏ ਜਾ ਰਹੇ ਮਿਸ਼ਨ 13-0 ਤਹਿਤ ਕੱਢਿਆ ਗਿਆ। ਰੋਡ ਸ਼ੋਅ ਦੌਰਾਨ ਸੀਐਮ ਮਾਨ ਦੇ ਨਾਲ ਪੰਜਾਬ ਦੇ ਕੈਬਨਿਟ ਮੰਤਰੀ ਬਲਕਾਰ ਸਿੰਘ ਅਤੇ ਜਲੰਧਰ ਸੀਟ ਤੋਂ ਆਪ ਦੇ ਉਮੀਦਵਾਰ ਪਵਨ ਕੁਮਾਰ ਟੀਨੂੰ ਵੀ ਮੌਜੂਦ ਸਨ। CM ਮਾਨ ਨੇ ਟੀਨੂੰ ਲਈ ਵੋਟਾਂ ਮੰਗੀਆਂ, ਜਿਸ ਤੋਂ ਬਾਅਦ ਸੀਐਮ ਮਾਨ ਹੁਣ ਨਕੋਦਰ ਲਈ ਰਵਾਨਾ ਹੋ ਗਏ। ਸੀਐਮ ਮਾਨ ਨਕੋਦਰ ਨੇੜੇ ਜਲੰਧਰ ਛਾਉਣੀ ਅਤੇ ਅਖੀਰ ਵਿੱਚ ਆਦਮਪੁਰ ਵਿੱਚ ਰੈਲੀ ਕਰਨਗੇ। ਜਲੰਧਰ ਕੈਂਟ ‘ਚ ਰੋਡ ਸ਼ੋਅ ਦੌਰਾਨ CM ਮਾਨ ਨੇ ਕਿਹਾ ਕਿ ਜਲੰਧਰ ਕੈਂਟ ‘ਚ ਰੋਡ ਸ਼ੋਅ ਹੋ ਜਾਏ ਤਾਂ ਮੈਦਾਨ ਫਤਿਹ ਹੋ ਜਾਂਦਾ ਹੈ। ਸੀ.ਐਮ ਮਾਨ ਨੇ ਕਿਹਾ ਕਿ ਮੈਂ ਇੱਕ ਸਾਲ ਪਹਿਲਾਂ ਵੀ ਆਇਆ ਸੀ, ਪਰ ਪਹਿਲਾਂ ਵਾਲੇ ਨੇ ਮੇਰੇ ਨਾਲ ਧੋਖਾ ਕੀਤਾ। ਉਨ੍ਹਾਂ ਕਿਹਾ ਕਿ ਸਾਈਕਲ ਦਾ ਵੀ ਸਟੈਂਡ ਹੁੰਦਾ ਏ ਪਰ ਪਿਛਲੇ ਉਮੀਦਵਾਰ ਦਾ ਕੋਈ ਸਟੈਂਡ ਨਹੀਂ ਸੀ ਪਰ ਇਸ ਵਾਰ ਇੱਦਾਂ ਨਹੀਂ ਹੋਊ। CM ਮਾਨ ਨੇ ਕਿਹਾ ਕਿ 1 ਜੂਨ ਨੂੰ ਵੋਟ ਪਾ ਕੇ ਆਪਣੀ ਜ਼ਿੰਮੇਵਾਰੀ ਪੂਰੀ ਕਰੋ। ਉਸ ਤੋਂ ਬਾਅਦ ਮੇਰੀ ਜ਼ਿੰਮੇਵਾਰੀ ਹੋਵੇਗੀ। CM ਮਾਨ ਨੇ ਕਿਹਾ ਕਿ 1 ਜੂਨ ਤੱਕ ਸਾਰੀਆਂ ਵਿਰੋਧੀ ਪਾਰਟੀਆਂ ਆਪੋ-ਆਪਣੇ ਕੰਮਾਂ ਤੋਂ ਮੁਕਤ ਹੋ ਜਾਣਗੀਆਂ। ਸੀਐਮ ਮਾਨ ਨੇ ਕਿਹਾ ਕਿ ਮੈਨੂੰ ਪਤਾ ਚੱਲ ਰਿਹਾ ਹੈ ਕਿ ਅਸੀਂ ਜਲੰਧਰ ਕੈਂਟ ਤੋਂ ਜਿੱਤ ਰਹੇ ਹਾਂ। ਜਲੰਧਰ ਦਿਹਾਤ ਪੁਲਿਸ ਨੇ ਸਾਰੇ ਪ੍ਰੋਗਰਾਮਾਂ ਨੂੰ ਲੈ ਕੇ ਸੁਰੱਖਿਆ ਵਧਾ ਦਿੱਤੀ ਹੈ। ਪੁਲਿਸ ਮੁੱਖ ਮੰਤਰੀ ਮਾਨ ਦੇ ਰੋਡ ਸ਼ੋਅ ਦੇ ਰੂਟ ਦੇ ਹਰ ਨੁੱਕਰੇ ‘ਤੇ ਤਿੱਖੀ ਨਜ਼ਰ ਰੱਖ ਰਹੀ ਹੈ।