ਕੰਗਨਾ ਦੇ ਥੱਪੜ ਮਾਰਨ ਵਾਲੀ ਕੁਲਵਿੰਦਰ ਕੌਰ ਦੇ ਭਰਾ ਨੇ ਲਾਈਵ ਹੋ ਕੇ ਸਿੱਖਾਂ ਤੋਂ ਮੰਗੀ ਮਦਦ

ਸੰਸਦ ਮੈਂਬਰ ਕੰਗਨਾ ਰਨੌਤ ਦੇ ਥੱਪੜ ਮਾਰਨ ਵਾਲੀ CISF ਜਵਾਨ ਕੁਲਵਿੰਦਰ ਕੌਰ ਦੇ ਭਰਾ ਸ਼ੇਰ ਸਿੰਘ ਨੇ ਲਾਈਵ ਹੋ ਕੇ ਸਿੱਖਾਂ ਤੋਂ ਮਦਦ ਮੰਗੀ ਹੈ। ਕੁਲਵਿੰਦਰ ਕੌਰ ਦੇ ਭਰਾ ਸ਼ੇਰ ਸਿੰਘ ਨੇ ਸੰਗਤ ਨੂੰ ਬੇਨਤੀ ਕਰਦਿਆਂ ਕਿਹਾ, ‘‘ਦਾਲ ਫੁਲਕੇ ਨਾਲ ਜ਼ਿੰਦਗੀ ਅਤੇ ਮੌਤ ਦੀ ਲੜਾਈ ਅਸੀਂ ਹਰਿਆਣੇ ਦੇ ਬਾਰਡਰਾਂ ’ਤੇ ਲੜ ਰਹੇ ਹਾਂ। ਇਹ ਸਾਰਾ ਕੁਝ ਕਿਸਾਨੀ ਦੀ ਦੇਣ ਹੈ ਇਸ ਲਈ ਕੁਲਵਿੰਦਰ ਦੇ ਨਾਂ ’ਤੇ ਜੋ ਵੀ ਤਿਲ ਫੁਲ ਦੇਣਾ ਹੈ ਉਹ ਮਾਇਆ ਮੋਰਚਿਆਂ ’ਚ ਪੁਚਾਈ ਜਾਵੇ ਬਹੁਤ ਸਾਰੇ ਫੋਨ ਆਉਂਦੇ ਹਨ ਉਨ੍ਹਾਂ ਸਮਝਾਉਣਾ ਬਹੁਤ ਔਖਾ ਹੈ ਕਿ ਅਸੀਂ ਕਿਸੇ ਨੂੰ ਕੋਈ ਖਾਤਾ ਨੰਬਰ ਨਹੀਂ ਦੇਵਾਂਗੇ। ਜਿਸ ਕਿਸੇ ਵੀ ਮੇਰੇ ਭਰਾ ਜਾਂ ਵੀਰ ਅਤੇ ਸੰਸਥਾਂਵਾਂ ਨੇ ਮਾਇਆ ਇੱਕਠੀ ਕੀਤੀ ਹੈ। ਉਨ੍ਹਾਂ ਨੂੰ ਬੇਨਤੀ ਹੈ ਕਿ ਇਸ ਟਾਈਮ ਚਾਰ ਮੋਰਚੇ ਚੱਲ ਰਹੇ ਹਨ। ਤੁਸੀਂ ਮਾਇਆ ਇਨ੍ਹਾਂ ਮੋਰਚਿਆਂ ’ਤੇ ਪਹੁੰਚਾ ਦੇਵੋ ਕਿਉਂਕਿ ਉਥੇ ਸਖਤ ਜ਼ਰੂਰਤ ਹੈ। ਉਥੇ ਪਾਣੀ ਤੋਂ ਲੈ ਕੇ ਕਈ ਤਰ੍ਹਾਂ ਪ੍ਰਬੰਧ ਕਰਨੇ ਹਨ ਉਹ ਪੈਸੇ ਨਾਲ ਹੀ ਹੋਣੇ ਹਨ।’’ ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਮਾਇਆ ਕਿਸੇ ਦੇ ਖਾਤੇ ’ਚ ਨਾ ਪਾਈ ਜਾਵੇ, ਅਤੇ ਮੋਰਚੇ ’ਤੇ ਦਿਤੇ ਕਿਸੇ ਵੀ ਪੈਸੇ ਦੀ ਬਕਾਇਦਾ ਰਸੀਦ ਕਟਵਾ ਕੇ ਦਿਤੀ ਜਾਵੇ। ਜ਼ਿਕਰਯੋਗ ਹੈ ਕਿ ਇਸ ਸਮੇਂ ਸ਼ੰਭੂ, ਖਨੌਰੀ, ਰਤਨਪੁਰਾ ਰਾਜਸਥਾਨ ਡੱਬਵਾਲੀ ਮੋਰਚਿਆਂ ’ਤੇ ਕਿਸਾਨੀ ਮੋਰਚੇ ਚਲ ਰਹੇ ਹਨ।