ਜ਼ਿਲ੍ਹਾ ਉਪਭੋਗਤਾ ਕਮਿਸ਼ਨ ਨੇ 74 ਸਾਲਾ ਬਜ਼ੁਰਗ ਦੇ ਇਲਾਜ ਵਿੱਚ ਵੱਡੀ ਲਾਪਰਵਾਹੀ ਵਰਤਣ ਦੇ ਦੋਸ਼ ਹੇਠ ਮੋਹਾਲੀ ਦੇ ਮੈਕਸ ਹਸਪਤਾਲ ਅਤੇ ਸਬੰਧਤ ਸਰਜਨ ਨੂੰ ਸਖ਼ਤ ਫਟਕਾਰ ਲਗਾਈ ਹੈ। ਕਮਿਸ਼ਨ ਨੇ ਇਸ ਮਾਮਲੇ ਨੂੰ ਸੇਵਾ ਵਿਚ ਕਮੀ ਅਤੇ ਅਨੁਚਿਤ ਵਪਾਰ ਦੀ ਸ਼੍ਰੇਣੀ ਵਿਚ ਰੱਖਦਿਆਂ ਹਸਪਤਾਲ ਨੂੰ ਕੁੱਲ 4.75 ਲੱਖ ਰੁਪਏ ਦੀ ਅਦਾਇਗੀ ਕਰਨ ਦੇ ਹੁਕਮ ਦਿੱਤੇ ਹਨ। ਇਸ ਰਕਮ ਵਿਚ 3.25 ਲੱਖ ਰੁਪਏ ਇਲਾਜ ਦਾ ਖਰਚਾ (9 ਫੀਸਦੀ ਵਿਆਜ ਸਮੇਤ), 1 ਲੱਖ ਰੁਪਏ ਮਾਨਸਿਕ ਪ੍ਰੇਸ਼ਾਨੀ ਲਈ ਮੁਆਵਜ਼ਾ ਅਤੇ 50 ਹਜ਼ਾਰ ਰੁਪਏ ਕਾਨੂੰਨੀ ਖਰਚੇ ਵਜੋਂ ਸ਼ਾਮਲ ਹਨ। ਮਾਮਲੇ ਦੀ ਜਾਣਕਾਰੀ ਦਿੰਦਿਆਂ ਚੰਡੀਗੜ੍ਹ ਨਿਵਾਸੀ ਸ਼ਿਕਾਇਤਕਰਤਾ ਕ੍ਰਿਸ਼ਨਾ ਰਾਣੀ ਨੇ ਦੱਸਿਆ ਕਿ ਮਾਰਚ 2020 ’ਚ ਉਨ੍ਹਾਂ ਦੇ ਪਤੀ ਨੂੰ ਕਮਰ ਦਰਦ ਕਾਰਨ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਸੀ, ਪਰ ਸਰਜਰੀ ਤੋਂ ਬਾਅਦ ਹਾਲਤ ਸੁਧਰਨ ਦੀ ਬਜਾਏ ਹੋਰ ਵਿਗੜ ਗਈ। ਕਮਿਸ਼ਨ ਨੇ ਰੀਕਾਰਡ ਦੀ ਪੜਤਾਲ ਕਰਦਿਆਂ ਪਾਇਆ ਕਿ ਹਸਪਤਾਲ ਨੇ ਮਰੀਜ਼ ਦੀ ਵਧੇਰੇ ਉਮਰ ਅਤੇ ਸ਼ੂਗਰ ਵਰਗੀ ਬਿਮਾਰੀ ਨੂੰ ਧਿਆਨ ਵਿੱਚ ਰੱਖਦਿਆਂ ਲੋੜੀਂਦੀ ਸਾਵਧਾਨੀ ਨਹੀਂ ਵਰਤੀ। ਸਰਜਰੀ ਤੋਂ ਪਹਿਲਾਂ ਹੱਡੀਆਂ ਦੀ ਮਜ਼ਬੂਤੀ ਦੀ ਜਾਂਚ ਲਈ ਜ਼ਰੂਰੀ ਡੈਕਸਾ ਸਕੈਨ ਵਰਗੇ ਟੈਸਟ ਨਹੀਂ ਕਰਵਾਏ ਗਏ ਅਤੇ ਇਕ ਸਾਲ ਪੁਰਾਣੀ ਰੀਪੋਰਟ ਦੇ ਆਧਾਰ ’ਤੇ ਹੀ ਅਪਰੇਸ਼ਨ ਕਰ ਦਿਤਾ ਗਿਆ।