ਬਸੀ ਪਠਾਣਾ ਤੋਂ ਇੱਕ ਬੇਹੱਦ ਹੈਰਾਨ ਕਰ ਦੇਣ ਵਾਲਾ ਅਤੇ ਚਿੰਤਾਜਨਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਚੋਰਾਂ ਵੱਲੋਂ ਚਲਾਕੀ ਨਾਲ ਏ.ਟੀ.ਐਮ. ਕਾਰਡ ਬਦਲ ਕੇ ਇੱਕ ਵਿਅਕਤੀ ਨਾਲ ਹਜ਼ਾਰਾਂ ਰੁਪਏ ਦੀ ਠੱਗੀ ਮਾਰੀ ਗਈ । ਇਹ ਸਾਰੀ ਘਟਨਾ ਉੱਥੇ ਲੱਗੇ ਸੀ.ਸੀ.ਟੀ.ਵੀ. ਕੈਮਰੇ ਵਿੱਚ ਵੀ ਕੈਦ ਹੋ ਗਈ ਹੈ । ਪੀੜਤ ਦੀ ਪਛਾਣ ਹੀਰਾ ਲਾਲ ਵਜੋਂ ਹੋਈ ਹੈ, ਜੋ ਬਸੀ ਪਠਾਣਾ ਦਾ ਰਹਿਣ ਵਾਲਾ ਹੈ ਅਤੇ ਸਾਊਂਡ ਦਾ ਕੰਮ ਕਰਦਾ ਹੈ। ਹੀਰਾ ਲਾਲ ਨੇ ਦੱਸਿਆ ਕਿ ਦੁੱਧ ਦੇ ਪੈਸੇ ਦੇਣ ਲਈ ਏ.ਟੀ.ਐਮ. ਵਿੱਚੋਂ ਨਕਦੀ ਕਢਵਾਉਣ ਗਏ ਸਨ । ਜਦੋਂ ਉਹ ਪੈਸੇ ਕਢਵਾਉਣ ਦੀ ਪ੍ਰਕਿਰਿਆ ਕਰ ਰਹੇ ਸਨ, ਤਾਂ ਇੱਕ ਟੋਪੀ ਵਾਲਾ ਅਣਪਛਾਤਾ ਵਿਅਕਤੀ ਆ ਕੇ ਉਨ੍ਹਾਂ ਦੇ ਬਿਲਕੁਲ ਪਿੱਛੇ ਖੜ੍ਹਾ ਹੋ ਗਿਆ । ਹੀਰਾ ਲਾਲ ਵੱਲੋਂ ਉਸ ਨੂੰ ਪਿੱਛੇ ਹਟਣ ਲਈ ਵੀ ਕਿਹਾ ਗਿਆ ਪਰ ਉਹ ਵਿਅਕਤੀ ਆਪਣੀ ਜਗ੍ਹਾ ਤੋਂ ਟੱਸ ਤੋਂ ਮੱਸ ਨਾ ਹੋਇਆ । ਜਿਵੇਂ ਹੀ ਹੀਰਾ ਲਾਲ ਨੇ ਪੈਸੇ ਕਢਵਾਉਣ ਲਈ ਆਪਣਾ ਗੁਪਤ ਪਿੰਨ ਨੰਬਰ ਭਰਿਆ ਅਤੇ ਮਸ਼ੀਨ ਵਿੱਚੋਂ ਪੈਸੇ ਬਾਹਰ ਨਿਕਲੇ, ਤੁਰੰਤ ਹੀ ਉਸ ਟੋਪੀ ਵਾਲੇ ਵਿਅਕਤੀ ਦਾ ਦੂਜਾ ਸਾਥੀ ਵੀ ਅੰਦਰ ਦਾਖਲ ਹੋ ਗਿਆ। ਦੋਵਾਂ ਠੱਗਾਂ ਨੇ ਅੱਖ ਦੇ ਫੋਰ ਵਿੱਚ ਹੀਰਾ ਲਾਲ ਦਾ ਅਸਲੀ ਏ.ਟੀ.ਐਮ. ਕਾਰਡ ਆਪਣੇ ਕੋਲ ਰੱਖ ਲਿਆ ਅਤੇ ਉਸ ਨੂੰ ਧੋਖੇ ਨਾਲ ਕੋਈ ਹੋਰ ਕਾਰਡ ਫੜਾ ਦਿੱਤਾ । ਇਸ ਤੋਂ ਬਾਅਦ ਮੁਲਜ਼ਮਾਂ ਨੇ ਹੀਰਾ ਲਾਲ ਦੇ ਖਾਤੇ ਵਿੱਚੋਂ ਵੱਖ-ਵੱਖ ਥਾਵਾਂ ਤੋਂ ਕੁੱਲ 41,300 ਰੁਪਏ ਦੀ ਰਕਮ ਉਡਾ ਲਈ । ਪੀੜਤ ਨੇ ਦੱਸਿਆ ਕਿ ਉਕਤ ਮੁਲਜ਼ਮ ਮੋਟਰਸਾਈਕਲ ‘ਤੇ ਸਵਾਰ ਹੋ ਕੇ ਆਏ ਸਨ। ਪੀੜਤ ਵੱਲੋਂ ਇਸ ਦੀ ਸ਼ਿਕਾਇਤ ਪੁਲਿਸ ਨੂੰ ਦੇ ਦਿੱਤੀ ਗਈ ਹੈ। ਦੂਜੇ ਪਾਸੇ ਪੁਲਿਸ ਚੌਂਕੀ ਸਿਟੀ ਬਸੀ ਪਠਾਣਾ ਦੇ ਇੰਚਾਰਜ ਜਗਦੀਪ ਸਿੰਘ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਪੁਲਿਸ ਵੱਲੋਂ ਬਾਰੀਕੀ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਸੀ.ਸੀ.ਟੀ.ਵੀ. ਫੁਟੇਜ ਦੇ ਅਧਾਰ ‘ਤੇ ਚੋਰਾਂ ਦੀ ਭਾਲ ਜਾਰੀ ਹੈ।