ਪੰਜਾਬ ਅਤੇ ਹਰਿਆਣਾ ਦੇ ਕੌਮੀ ਰਾਜਮਾਰਗਾਂ ’ਤੇ ਸਫ਼ਰ ਕਰਨਾ ਹੁਣ ਹੋਰ ਮਹਿੰਗਾ ਹੋਣ ਜਾ ਰਿਹਾ ਹੈ। ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ਼ ਇੰਡੀਆ (ਐਨ.ਐਚ.ਏ.ਆਈ.) ਨੇ ਖੇਤਰ ਦੇ 8 ਪ੍ਰਮੁੱਖ ਟੋਲ ਪਲਾਜ਼ਿਆਂ ’ਤੇ ਯੂਜ਼ਰ ਫੀਸਾਂ ਵਿਚ ਸੋਧ ਕੀਤੀ ਹੈ, ਜਿਸ ਨਾਲ ਸੰਗਰੂਰ, ਲੁਧਿਆਣਾ, ਅੰਮ੍ਰਿਤਸਰ ਅਤੇ ਬਠਿੰਡਾ ਸਮੇਤ ਕਈ ਸ਼ਹਿਰਾਂ ਦੇ ਰਾਹਗੀਰਾਂ ਨੂੰ ਪ੍ਰਤੀ ਗੇੜ 5 ਤੋਂ 10 ਰੁਪਏ ਵਧੇਰੇ ਖਰਚਣੇ ਪੈਣਗੇ। ਇਸ ਸੋਧ ਤਹਿਤ ਚੰਡੀਗੜ੍ਹ-ਖਰੜ-ਲੁਧਿਆਣਾ ਸੈਕਸ਼ਨ ਦੇ ਘੁਲਾਲ ਟੋਲ ਪਲਾਜ਼ਾ ’ਤੇ ਨਿੱਜੀ ਕਾਰਾਂ ਲਈ ਇਕਪਾਸੜ ਕਿਰਾਇਆ 115 ਰੁਪਏ ਅਤੇ ਦੋਹਾਂ ਪਾਸਿਆਂ ਦਾ 170 ਰੁਪਏ ਕਰ ਦਿਤਾ ਗਿਆ ਹੈ। ਐਨ.ਐਚ.ਏ.ਆਈ. ਦੇ ਅਧਿਕਾਰੀਆਂ ਅਨੁਸਾਰ, ‘‘ਪਿਛਲੇ ਸਾਲ ਕੁੱਝ ਮਾਮਲਿਆਂ ਵਿਚ ਯੂਜ਼ਰ ਫੀਸ ਘਟਾਈ ਗਈ ਸੀ। ਸੋਧੇ ਹੋਏ ਫਰੇਮਵਰਕ ਦੇ ਤਹਿਤ ਹੁਣ ਦਰਾਂ ਨੂੰ ਬਹਾਲ ਕੀਤਾ ਗਿਆ ਹੈ ਅਤੇ ਜ਼ਿਆਦਾਤਰ ਥਾਵਾਂ ’ਤੇ ਇਹ ਵਾਧਾ ਬਹੁਤ ਮਾਮੂਲੀ ਹੈ।’’ (ਪੀ.ਟੀ.ਆਈ.)