ਸਕੂਲਾਂ ਲਈ ਸੋਸ਼ਲ ਮੀਡੀਆ ਉਤੇ ਸਰਗਰਮ ਹੋਣਾ ਲਾਜ਼ਮੀ
ਵਿਭਾਗ ਨੇ 20 ਜੁਲਾਈ ਤੱਕ ਅਧਿਕਾਰਤ ਸੋਸ਼ਲ ਮੀਡੀਆ ਖਾਤਿਆਂ ਦਾ ਵੇਰਵਾ ਮੰਗਿਆ
ਐਸ.ਏ.ਐਸ. ਨਗਰ (ਸਤਵਿੰਦਰ ਸਿੰਘ ਧੜਾਕ) : ਸਕੂਲ ਸਿਖਿਆ ਵਿਭਾਗ ਨੇ ਸੂਬੇ ਦੇ ਸਰਕਾਰੀ ਸਕੂਲਾਂ ਵਿਚ ਪੜ੍ਹਦੇ ਹਰ ਵਿਦਿਆਰਥੀ ਦੇ ਰਿਕਾਰਡ ਦੀ ਮੁੜ ਤਸਦੀਕ ਕਰਨ ਦੀ ਕਵਾਇਦ ਸ਼ੁਰੂ ਕਰ ਦਿਤੀ ਹੈ। ਇਸ ਤਹਿਤ ਸਮੂਹ ਸਕੂਲ ਮੁਖੀਆਂ ਨੂੰ ਐਮ-ਸਟਾਰ ਐਪ ’ਤੇ ਹਰ ਵਿਦਿਆਰਥੀ ਦੇ ਦੋਵੇਂ ਮਾਪਿਆਂ ਜਾਂ ਸਰਪ੍ਰਸਤਾਂ ਦੇ ਮੋਬਾਈਲ ਨੰਬਰ ਅਤੇ ਪੂਰਾ ਰਿਹਾਇਸ਼ੀ ਪਤਾ ਅਪਡੇਟ ਕਰਨ ਲਈ 24 ਜੁਲਾਈ ਤਕ ਦੀ ਸਮਾਂ-ਸੀਮਾ ਦਿਤੀ ਗਈ ਹੈ। ਇਸ ਦੇ ਨਾਲ ਹੀ ਹਰ ਸਰਕਾਰੀ ਸਕੂਲ ਲਈ ਘੱਟੋ-ਘੱਟ ਇਕ ਅਧਿਕਾਰਤ ਸੋਸ਼ਲ ਮੀਡੀਆ ਪਲੇਟਫਾਰਮ ’ਤੇ ਸਰਗਰਮ ਮੌਜੂਦਗੀ ਵੀ ਲਾਜ਼ਮੀ ਕਰ ਦਿਤੀ ਗਈ ਹੈ। ਰਾਜ ਵਿਦਿਅਕ ਖੋਜ ਅਤੇ ਸਿਖਲਾਈ ਪ੍ਰੀਸ਼ਦ (ਐਸਸੀਈਆਰਟੀ), ਪੰਜਾਬ ਵਲੋਂ ਜ਼ਿਲ੍ਹਾ ਸਿਖਿਆ ਅਫ਼ਸਰਾਂ (ਸੈਕੰਡਰੀ ਤੇ ਐਲੀਮੈਂਟਰੀ) ਨੂੰ ਜਾਰੀ ਹਦਾਇਤਾਂ ਵਿਚ ਕਿਹਾ ਗਿਆ ਹੈ ਕਿ ਸਕੂਲ ਮੁਖੀ ਹਰ ਵਿਦਿਆਰਥੀ ਸਬੰਧੀ ਉਪਲਬਧ ਦੋਵੇਂ ਮਾਪਿਆਂ ਜਾਂ ਸਰਪ੍ਰਸਤਾਂ ਦੇ ਮੋਬਾਈਲ ਨੰਬਰ ਤੇ ਵਿਦਿਆਰਥੀ ਦਾ ਪੂਰਾ ਰਿਹਾਇਸ਼ੀ ਪਤਾ ਤਸਦੀਕ ਕਰ ਕੇ ਐਮ-ਸਟਾਰ ਐਪ ’ਤੇ ਅਪਡੇਟ ਕਰਨ। ਇਹ ਕਾਰਜ ਹਰ ਹਾਲਤ ਵਿਚ 24 ਜੁਲਾਈ ਤਕ ਮੁਕੰਮਲ ਕੀਤਾ ਜਾਣਾ ਹੈ। ਵਿਭਾਗ ਨੇ ਸਾਰੇ ਸਰਕਾਰੀ ਸਕੂਲਾਂ ਨੂੰ ਐਕਸ (ਪਹਿਲਾਂ ਟਵਿੱਟਰ), ਫੇਸਬੁੱਕ ਜਾਂ ਇੰਸਟਾਗ੍ਰਾਮ ਵਿਚੋਂ ਕਿਸੇ ਇਕ ਪਲੇਟਫਾਰਮ ’ਤੇ ਅਪਣਾ ਅਧਿਕਾਰਤ ਅਤੇ ਸਰਗਰਮ ਸੋਸ਼ਲ ਮੀਡੀਆ ਖਾਤਾ ਬਣਾਈ ਰੱਖਣ ਦੇ ਵੀ ਨਿਰਦੇਸ਼ ਦਿਤੇ ਹਨ। ਜਿਨ੍ਹਾਂ ਸਕੂਲਾਂ ਦੇ ਖਾਤੇ ਪਹਿਲਾਂ ਤੋਂ ਹਨ, ਉਹ ਉਨ੍ਹਾਂ ਦਾ ਵੇਰਵਾ ਨਿਰਧਾਰਤ ਵੈੱਬ ਫਾਰਮ ਰਾਹੀਂ ਭੇਜਣਗੇ, ਜਦਕਿ ਜਿਨ੍ਹਾਂ ਸਕੂਲਾਂ ਦੇ ਖਾਤੇ ਨਹੀਂ ਹਨ, ਉਹ 20 ਜੁਲਾਈ ਤਕ ਖਾਤਾ ਬਣਾ ਕੇ ਉਸ ਦੀ ਜਾਣਕਾਰੀ ਵਿਭਾਗ ਨੂੰ ਭੇਜਣਗੇ। ਹਦਾਇਤਾਂ ਵਿਚ ਇਹ ਵੀ ਸਪੱਸ਼ਟ ਕੀਤਾ ਗਿਆ ਹੈ ਕਿ ਸਕੂਲ ਮੁਖੀ ਸਕੂਲ ਦੀਆਂ ਚੰਗੀਆਂ ਪਹਿਲਕਦਮੀਆਂ, ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਦੀਆਂ ਪ੍ਰਾਪਤੀਆਂ, ਨਵੀਨਤਾਕਾਰੀ ਗਤੀਵਿਧੀਆਂ, ਐਸ.ਐਮ.ਸੀ. (ਸਕੂਲ ਪ੍ਰਬੰਧਨ ਕਮੇਟੀ) ਦੀਆਂ ਪਹਿਲਾਂ ਤੇ ਹੋਰ ਮਹੱਤਵਪੂਰਨ ਸਮਾਗਮਾਂ ਸਬੰਧੀ ਜਾਣਕਾਰੀ ਨਿਯਮਿਤ ਤੌਰ ’ਤੇ ਸਕੂਲ ਦੇ ਅਧਿਕਾਰਤ ਸੋਸ਼ਲ ਮੀਡੀਆ ਖ਼ਾਤਿਆਂ ਰਾਹੀਂ ਸਾਂਝੀ ਕਰਨ। ਡਾਇਰੈਕਟਰ ਜਨਰਲ ਸਕੂਲ ਸਿਖਿਆ, ਪੰਜਾਬ ਐਮ.ਕੇ. ਅਰਵਿੰਦ ਕੁਮਾਰ ਵਲੋਂ ਜਾਰੀ ਪੱਤਰ ਵਿਚ ਸਮੂਹ ਜ਼ਿਲ੍ਹਾ ਸਿਖਿਆ ਅਫ਼ਸਰਾਂ ਨੂੰ ਅਪਣੇ ਅਧੀਨ ਆਉਂਦੇ ਸਰਕਾਰੀ ਸਕੂਲਾਂ ਵਿਚ ਇਨ੍ਹਾਂ ਹਦਾਇਤਾਂ ਦੀ ਸਖ਼ਤੀ ਨਾਲ ਪਾਲਣਾ ਯਕੀਨੀ ਬਣਾਉਣ, ਨਿਯਮਿਤ ਨਿਗਰਾਨੀ ਰੱਖਣ ਅਤੇ ਨਿਰਧਾਰਤ ਸਮਾਂ-ਸੀਮਾਵਾਂ ਅੰਦਰ ਕਾਰਵਾਈ ਮੁਕੰਮਲ ਕਰਵਾਉਣ ਲਈ ਕਿਹਾ ਗਿਆ ਹੈ।