ਲੁਧਿਆਣਾ ਵਿੱਚ ਕੁੱਤੇ ਨੂੰ ਲੈ ਕੇ ਸ਼ੁਰੂ ਹੋਇਆ ਵਿਵਾਦ ਖੂਨੀ ਸੰਘਰਸ਼ ਵਿੱਚ ਬਦਲ ਗਿਆ। ਕੁਝ ਨੌਜਵਾਨਾਂ ਨੇ ਕੇਕ ਲੈਣ ਗਈ ਮੁਟਿਆਰ ਨਾਲ ਬਦਸਲੂਕੀ ਕੀਤੀ। ਇੰਨਾ ਹੀ ਨਹੀਂ, ਮੌਕੇ ‘ਤੇ ਪਹੁੰਚੇ ਉਸ ਦੇ ਪਿਤਾ ਅਤੇ ਭਰਾ ‘ਤੇ ਦੋਸ਼ੀਆਂ ਨੇ ਫਾਇਰਿੰਗ ਕਰ ਦਿੱਤੀ । ਪੀੜਤ ਦੇ ਮੁਤਾਬਕ ਦੋਸ਼ੀਆਂ ਨੇ ਕੁੱਲ 6 ਰੌਂਡ ਫਾਇਰ ਕੀਤੇ, ਜਿਨ੍ਹਾਂ ਵਿੱਚੋਂ ਦੋ ਹਵਾਈ ਫਾਇਰ ਸਨ । ਗੋਲੀ ਲੱਗਣ ਨਾਲ ਪਿਓ-ਪੁੱਤ ਦੋਵੇਂ ਜ਼ਖ਼ਮੀ ਹੋ ਗਏ। ਜ਼ਖ਼ਮੀ ਵੰਸ਼ ਨੇ ਦੱਸਿਆ ਕਿ ਬੁੱਧਵਾਰ ਨੂੰ ਉਸ ਦੇ ਪਾਪਾ ਪ੍ਰਿੰਸ ਦਾ ਜਨਮ ਦਿਨ ਸੀ। ਉਸ ਦੀ ਭੈਣ ਸਿਵਲ ਸਿਟੀ ਇਲਾਕੇ ਵਿੱਚ ਕੇਕ ਲੈਣ ਗਈ ਸੀ। ਉੱਥੇ ਇੱਕ ਨੌਜਵਾਨ ਕੁੱਤਾ ਘੁਮਾ ਰਿਹਾ ਸੀ । ਭੈਣ ਨੇ ਆਮ ਵਾਂਗ ਪੁੱਛ ਲਿਆ ਕਿ ਕੁੱਤਾ ਵੱਢਦਾ ਤਾਂ ਨਹੀਂ ਹੈ । ਇਸੇ ਗੱਲ ‘ਤੇ ਨੌਜਵਾਨ ਭੜਕ ਗਿਆ। ਉਸ ਨੇ ਭੈਣ ਨਾਲ ਬਦਸਲੂਕੀ ਸ਼ੁਰੂ ਕਰ ਦਿੱਤੀ। ਕੁੜੀ ਨੇ ਤੁਰੰਤ ਆਪਣੇ ਪਿਤਾ ਅਤੇ ਭਰਾ ਨੂੰ ਫੋਨ ਕਰਕੇ ਬੁਲਾ ਲਿਆ। ਪਿਓ-ਪੁੱਤ ਉੱਥੇ ਪਹੁੰਚੇ ਅਤੇ ਨੌਜਵਾਨ ਤੋਂ ਬਦਸਲੂਕੀ ਦਾ ਕਾਰਨ ਪੁੱਛਿਆ, ਜਿਸ ਨਾਲ ਬਹਿਸ ਵਧ ਗਈ। ਇਸੇ ਦੌਰਾਨ ਦੋਸ਼ੀਆਂ ਵਿੱਚੋਂ ਇੱਕ ਨੌਜਵਾਨ ਭੱਜ ਕੇ ਆਪਣੇ ਘਰ ਗਿਆ ਅਤੇ ਬੰਦੂਕ ਚੁੱਕ ਲਿਆਇਆ। ਉਸ ਨੇ ਵਾਪਸ ਆਉਂਦੇ ਹੀ ਫਾਇਰਿੰਗ ਸ਼ੁਰੂ ਕਰ ਦਿੱਤੀ। ਪੀੜਤ ਨੇ ਦੱਸਿਆ ਕਿ ਮੌਕੇ ‘ਤੇ ਕੁੱਲ 6 ਰਾਊਂਡ ਫਾਇਰ ਕੀਤੇ ਗਏ। ਦਹਿਸ਼ਤ ਫੈਲਾਉਣ ਲਈ 2 ਹਵਾਈ ਫਾਇਰ ਕੀਤੇ ਗਏ, ਜਦਕਿ ਬਾਕੀ ਗੋਲੀਆਂ ਸਿੱਧਾ ਪਿਓ-ਪੁੱਤ ਨੂੰ ਨਿਸ਼ਾਨਾ ਬਣਾ ਕੇ ਚਲਾਈਆਂ ਗਈਆਂ। ਹਮਲੇ ਵਿੱਚ ਪਿਤਾ ਅਤੇ ਪੁੱਤਰ ਦੋਵਾਂ ਦੀ ਖੱਬੀ ਲੱਤ ਵਿੱਚ ਗੋਲੀ ਲੱਗੀ ਹੈ। ਪੁੱਤ ਦੀ ਲੱਤ ਤੋਂ ਗੋਲੀ ਆਰ-ਪਾਰ ਹੋ ਗਈ ਹੈ। ਹਮਲੇ ਦੌਰਾਨ ਉਸ ਦੀ ਬਾਂਹ ‘ਤੇ ਵੀ ਗੰਭੀਰ ਸੱਟ ਆਈ ਹੈ, ਜਿੱਥੇ 9 ਟਾਂਕੇ ਲੱਗੇ ਹਨ । ਉੱਥੇ ਹੀ ਪਿਤਾ ਦੀ ਹਾਲਤ ਗੰਭੀਰ ਹੈ, ਕਿਉਂਕਿ ਗੋਲੀ ਉਨ੍ਹਾਂ ਦੀ ਲੱਤ ਵਿੱਚ ਹੀ ਫਸੀ ਹੋਈ ਹੈ। ਐਸ. ਐਚ.ਓ. ਹੈਬੋਵਾਲ ਜਸਬੀਰ ਸਿੰਘ ਨੇ ਦੱਸਿਆ ਕਿ ਮਾਮਲਾ ਉਨ੍ਹਾਂ ਦੇ ਧਿਆਨ ਵਿੱਚ ਜ਼ਰੂਰ ਹੈ। ਜਾਂਚ ਚੱਲ ਰਹੀ ਹੈ, ਪਰ ਅਜੇ ਤੱਕ ਗੋਲੀ ਚੱਲਣ ਦੀ ਕੋਈ ਸੂਚਨਾ ਉਨ੍ਹਾਂ ਕੋਲ ਨਹੀਂ ਹੈ। ਜਾਂਚ ਪੂਰੀ ਹੋਣ ਤੋਂ ਬਾਅਦ ਹੀ ਪੂਰਾ ਮਾਮਲਾ ਸਾਫ਼ ਹੋ ਸਕੇਗਾ।