ਮੋਹਾਲੀ ਜ਼ਿਲ੍ਹੇ ਅਧੀਨ ਆਉਂਦੇ ਪਿੰਡ ਬਹਿਲੋਲਪੁਰ ਦੇ ਨੌਜਵਾਨ ਵਲੋਂ ਇੱਕ ਪਿਸਤੌਲ ਨਾਲ ਹਵਾਈ ਫਾਇਰ ਕਰਕੇ ਉਸ ਦੀ ਵੀਡੀਓ ਬਣਾ ਕੇ ਅਤੇ ਗੀਤ ਲਗਾ ਕੇ ਸੋਸ਼ਲ ਮੀਡੀਆ ’ਤੇ ਸਟੇਟਸ ਲਗਾ ਦਿੱਤਾ । ਉਸ ਨੂੰ ਇਹ ਠਾਠ ਦਿਖਾਉਣਾ ਮਹਿੰਗਾ ਪੈ ਗਿਆ ਜਿਸ ’ਤੇ ਪੁਲਸ ਨੇ ਉਸ ਖਿਲਾਫ਼ ਮਾਮਲਾ ਦਰਜ ਕਰ ਲਿਆ । ਥਾਣਾ ਮੁਖੀ ਕਰਮਜੀਤ ਸਿੰਘ ਨੇ ਦੱਸਿਆ ਕਿ ਪੁਲਿਸ ਨੂੰ ਕਿਸੇ ਮੁਖ਼ਬਰ ਨੇ ਇਤਲਾਹ ਦਿੱਤੀ ਕਿ ਬਹਿਲੋਲਪੁਰ ਦਾ ਵਾਸੀ ਬਿਕਰਮਜੀਤ ਸਿੰਘ ਜਿਸ ਨੇ ਆਪਣੇ ਮੋਬਾਇਲ ’ਤੇ ਸਟੇਟਸ ਲਗਾਇਆ ਹੈ, ਜਿਸ ਵਿਚ ਉਹ ਪਿਸਤੌਲ ਨਾਲ ਤਿੰਨ ਹਵਾਈ ਫਾਇਰ ਕਰਦਾ ਨਜ਼ਰ ਆ ਰਿਹਾ ਹੈ । ਬਿਕਰਮਜੀਤ ਸਿੰਘ ਪਾਸ ਕੋਈ ਲਾਇਸੈਂਸੀ ਅਸਲਾ ਨਹੀਂ ਹੈ, ਪਰ ਉਸ ਵਲੋਂ ਹਵਾਈ ਫਾਇਰ ਕਰਨ ਸਬੰਧੀ ਸਟੇਟਸ ਲਗਾਉਣ ਨਾਲ ਆਮ ਲੋਕਾਂ ’ਚ ਡਰ ਅਤੇ ਸਹਿਮ ਦਾ ਮਾਹੌਲ ਪੈਦਾ ਹੋਇਆ ਹੈ । ਥਾਣਾ ਮੁਖੀ ਅਨੁਸਾਰ ਮੁਖ਼ਬਰ ਨੇ ਇਹ ਸੂਚਨਾ ਵੀ ਦਿੱਤੀ ਕਿ ਫਾਇਰ ਵਾਲੀ ਵੀਡੀਓ ਨਾਲ ਪਿੰਡ ਬਹਿਲੋਲਪੁਰ ਵਿਚ ਦਹਿਸ਼ਤ ਵਾਲਾ ਮਾਹੌਲ ਬਣਿਆ ਹੋਇਆ ਹੈ ਅਤੇ ਜੇਕਰ ਇਸ ਨੂੰ ਕਾਬੂ ਨਾ ਕੀਤਾ ਗਿਆ ਤਾਂ ਉਹ ਕਿਸੇ ਵੀ ਸਮੇਂ ਪਬਲਿਕ ਦਾ ਜਾਨੀ, ਮਾਲੀ ਨੁਕਸਾਨ ਕਰ ਸਕਦਾ ਹੈ। ਥਾਣਾ ਮੁਖੀ ਕਰਮਜੀਤ ਸਿੰਘ ਨੇ ਦੱਸਿਆ ਕਿ ਪੁਲਸ ਵਲੋਂ ਬਿਕਰਮਜੀਤ ਸਿੰਘ ਖਿਲਾਫ਼ ਮਾਮਲਾ ਦਰਜ ਕਰ ਗ੍ਰਿਫ਼ਤਾਰ ਕਰ ਲਿਆ ਹੈ, ਜਿਸ ਨੂੰ ਅਦਾਲਤ ਵਿਚ ਪੇਸ਼ ਕਰਨ ਉਪਰੰਤ ਰਿਮਾਂਡ ’ਤੇ ਲਿਆ ਕੇ ਪੁੱਛਗਿੱਛ ਕੀਤੀ ਜਾਵੇਗੀ ਕਿ ਉਹ ਇਹ ਅਸਲਾ ਕਿਸ ਵਿਅਕਤੀ ਦਾ ਹੈ ਅਤੇ ਉਸਨੇ ਇਹ ਵੀਡੀਓ ਕਿਉਂ ਤੇ ਉਹਨਾਂ ਕਿੱਥੇ ਬਣਾਈ।