ਮਾਮਲਾ ਲੁਧਿਆਣਾ ਦੇ ਹੈਬੋਵਾਲ ਇਲਾਕੇ ਤੋਂ ਸਾਹਮਣੇ ਆਇਆ ਹੈ, ਜਿੱਥੇ ਪੁਲਿਸ ਵੱਲੋਂ ਤਿੰਨ ਮੁਲਜ਼ਮਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਉਹਨਾਂ ਕੋਲੋਂ 300 ਕਿੱਲੋ ਗਾਂਜਾ ਬਰਾਮਦ ਹੋਇਆ ਹੈ। ਗੱਲਬਾਤ ਕਰਦਿਆਂ ਡੀਸੀਪੀ ਆਲਮ ਨੇ ਕਿਹਾ ਕਿ ਬੀਤੀ ਕੱਲ੍ਹ ਰਾਤ ਬਲੈਰੋ ਗੱਡੀ ਵਿੱਚ ਇਹ ਤਿੰਨ ਮੁਲਜ਼ਮ ਜਾ ਰਹੇ ਸਨ। ਪੁਲਿਸ ਨੂੰ ਦੇਖ ਇਹਨਾਂ ਨੇ ਬੈਗ ਸੁੱਟਿਆ, ਜਿਸ ਵਿੱਚੋਂ ਪਹਿਲਾਂ 10 ਕਿੱਲੋ ਗਾਂਜਾ ਮਿਲਿਆ। ਇਹਨਾਂ ਦਾ ਪਿੱਛਾ ਕੀਤਾ ਗਿਆ, ਤਾਂ ਇੱਕ ਡੇਅਰੀ ਵਿੱਚ ਇਹ ਤਿੰਨੇ ਮੁਲਜ਼ਮ ਵੜ ਗਏ। ਇਸ ਤੋਂ ਬਾਅਦ ਪੁਲਿਸ ਨੇ ਡੇਅਰੀ ਵਿੱਚ ਜਾ ਕੇ ਜਾਂਚ ਕੀਤੀ, ਤਾਂ 290 ਕਿੱਲੋ ਗਾਂਜਾ ਹੋਰ ਬਰਾਮਦ ਕੀਤਾ ਗਿਆ। ਡੀਸੀਪੀ ਆਲਮ ਨੇ ਕਿਹਾ ਇਨ੍ਹਾਂ ਤਿੰਨਾਂ ਦੀ ਉਮਰ 25 ਤੋਂ 30 ਸਾਲ ਹੈ ਅਤੇ ਇਹ ਯੂ.ਪੀ. ਬਿਹਾਰ ਦੇ ਰਹਿਣ ਵਾਲੇ ਹਨ। ਇਹਨਾਂ ’ਤੇ ਪਹਿਲਾਂ ਅਜਿਹਾ ਕੋਈ ਮਾਮਲਾ ਨਹੀਂ ਦਰਜ ਹੈ। ਬਾਕੀ ਪੁੱਛਗਿੱਛ ਦੌਰਾਨ ਜਾਂਚ ਕੀਤੀ ਜਾਏਗੀ ਕਿ ਇਹਨਾਂ ਦੇ ਲਿੰਕ ਕਿੰਨਾ ਦੇ ਨਾਲ ਸਨ ਅਤੇ ਇਹ ਕਿੰਨੇ ਸਮੇਂ ਤੋਂ ਕੰਮ ਕਰ ਰਹੇ ਸਨ।