ਲੁਧਿਆਣਾ ਵਿੱਚ ਇੱਕ ਤੇਜ਼ ਰਫ਼ਤਾਰ ਸਕੂਲ ਬੱਸ ਨੇ ਸਾਈਕਲ ਸਵਾਰ ਵਿਦਿਆਰਥਣ ਨੂੰ ਕੁਚਲ ਦਿੱਤਾ। ਲੜਕੀ ਸਕੂਲ ਤੋਂ ਸਾਈਕਲ ‘ਤੇ ਘਰ ਵਾਪਸ ਜਾ ਰਹੀ ਸੀ, ਉਦੋਂ ਹੀ ਬੱਸ ਡਰਾਈਵਰ ਨੇ ਪਿੱਛੇ ਤੋਂ ਟੱਕਰ ਮਾਰ ਦਿੱਤੀ। ਟੱਕਰ ਤੋਂ ਬਾਅਦ ਲੜਕੀ ਬੱਸ ਦੇ ਹੇਠਾਂ ਆ ਗਈ ਅਤੇ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਈ। ਜ਼ਖ਼ਮੀ ਬੱਚੀ ਨੂੰ ਦੇਖਦਿਆਂ ਹੀ ਆਸ-ਪਾਸ ਦੇ ਲੋਕਾਂ ਨੇ ਉਸ ਨੂੰ ਨਜ਼ਦੀਕੀ ਹਸਪਤਾਲ ਪਹੁੰਚਾਇਆ, ਜਿੱਥੇ ਬੱਚੀ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ। ਦੂਜੇ ਪਾਸੇ, ਪੁਲਿਸ ਦਾ ਕਹਿਣਾ ਹੈ ਕਿ ਅਜੇ ਬੱਚੀ ਦੇ ਮਾਤਾ-ਪਿਤਾ ਵੱਲੋਂ ਕੋਈ ਸ਼ਿਕਾਇਤ ਨਹੀਂ ਮਿਲੀ ਹੈ। ਸ਼ਿਕਾਇਤ ਤੋਂ ਬਾਅਦ ਮਾਮਲਾ ਦਰਜ ਕਰਕੇ ਕਾਰਵਾਈ ਕੀਤੀ ਜਾਵੇਗੀ। ਫਿਲਹਾਲ ਬੱਸ ਡਰਾਈਵਰ ਫਰਾਰ ਹੈ। ਘਟਨਾ ਦੀ ਸੀ.ਸੀ.ਟੀ.ਵੀ. ਵੀਡੀਓ ਵਿੱਚ ਦਿਖਾਈ ਦੇ ਰਿਹਾ ਹੈ ਕਿ ਬੱਸ ਦੇ ਅੱਗੇ ਬੱਚੀ ਸਾਈਕਲ ‘ਤੇ ਜਾ ਰਹੀ ਹੈ। ਉਦੋਂ ਹੀ ਬੱਸ ਡਰਾਈਵਰ ਸਪੀਡ ਵਧਾਉਂਦਾ ਹੈ । ਥੋੜ੍ਹੀ ਦੇਰ ਵਿੱਚ ਅੱਗੇ ਜਾ ਰਹੀ ਬੱਚੀ ਨੂੰ ਪਿੱਛੇ ਤੋਂ ਬੱਸ ਟੱਕਰ ਮਾਰ ਦਿੰਦੀ ਹੈ । ਟੱਕਰ ਲੱਗਦਿਆਂ ਹੀ ਬੱਚੀ ਸਾਈਕਲ ਸਮੇਤ ਸੜਕ ‘ਤੇ ਡਿੱਗ ਜਾਂਦੀ ਹੈ ਅਤੇ ਬੱਸ ਉਸ ਦੇ ਉੱਪਰੋਂ ਲੰਘ ਜਾਂਦੀ ਹੈ। ਬੱਸ ਡਰਾਈਵਰ ਉਦੋਂ ਵੀ ਬੱਸ ਨਹੀਂ ਰੋਕਦਾ ਅਤੇ ਬੱਚੀ ਨੂੰ ਬੱਸ 5 ਮੀਟਰ ਤੱਕ ਘਸੀਟ ਕੇ ਲੈ ਜਾਂਦੀ ਹੈ।