ਫਗਵਾੜਾ – ਸਿੰਘੂ ਬਾਰਡਰ ਲਈ ਕਿਸਾਨਾਂ ਦਾ ਕਾਫਿਲਾ ਰਵਾਨਾ

ਪਾਂਸ਼ਟਾ, 27 ਨਵੰਬਰ (ਰਜਿੰਦਰ) – ਕਿਸਾਨ ਅੰਦੋਲਨ ਦਾ ਇੱਕ ਸਾਲ ਪੂਰਾ ਹੋਣ ‘ਤੇ ਸਿੰਘੂ ਬਾਰਡਰ ਵਿਖੇ ਸ੍ਰੀ ਅਖੰਡ ਪਾਠ ਸਾਹਿਬ ਆਰੰਭ ਕੀਤੇ ਗਏ ਹਨ, ਜਿਨ੍ਹਾਂ ਦੇ ਭੋਗ 28 ਨਵੰਬਰ ਨੂੰ ਪੈਣਗੇ। ਇਸ ਨੂੰ ਲੈ ਕੇ ਪੰਜਾਬ ਸਮੇਤ ਵੱਖ ਵੱਖ ਸੂਬਿਆਂ ਤੋਂ ਕਿਸਾਨ ਸਿੰਘੂ ਬਾਰਡਰ ਪਹੁੰਚ ਰਹੇ ਹਨ। ਇਸ ਦੇ ਤਹਿਤ ਫਗਵਾੜਾ ਨੇੜਲੇ ਪਿੰਡ ਨਸੀਰਾਬਾਦ ਤੋਂ ਵੀ ਕਿਸਾਨਾਂ ਅਤੇ ਪਿੰਡ ਵਾਸੀਆਂ ਦਾ ਕਾਫਿਲਾ ਸਿੰਘੂ ਬਾਰਡਰ ਵਾਸਤੇ ਰਵਾਨਾ ਹੋਇਆ। ਇਸ ਸਬੰਧੀ ਪਿੰਡ ਵਾਸੀ ਹਰਦੀਪ ਸਿੰਘ ਨੇ ਦੱਸਿਆ ਕਿ ਪਿੰਡ ਨਸੀਰਾਬਾਦ ਦੇ ਸਹਿਯੋਗ ਨਾਲ ਬਲਬੀਰ ਸਿੰਘ ਭੁੱਲਾਰਾਈ ਦਾ ਇੰਟਰਨੈਸ਼ਨਲ ਢਾਡੀ ਜਥਾ ਸਿੰਘੂ ਬਾਰਡਰ ਪਹੁੰਚ ਕੇ ਵਾਰਾਂ ਰਾਹੀ ਹਾਜ਼ਰ ਸੰਗਤਾਂ ਨੂੰ ਨਿਹਾਲ ਕਰੇਗਾ। ਇਸ ਦੇ ਨਾਲ ਹੀ ਉਨ੍ਹਾਂ ਪਧਾਨ ਮੰਤਰੀ ਪਾਸੋਂ MSP ‘ਤੇ ਕਾਨੂੰਨ ਬਣਾਉਣ, ਪਰਾਲੀ ਦਾ ਮੁੱਦਾ ਹੱਲ ਕਰਨ, ਬਿਜਲੀ ਸਮਝੌਤਿਆ ‘ਚ ਸੋਧ ਕਰਨ ਅਤੇ ਕਿਸਾਨਾਂ ਖਿਲਾਫ ਦਰਜ ਝੂਠੇ ਮਾਮਲੇ ਰੱਦ ਕਰਨ ਦੀ ਮੰਗ ਕੀਤੀ।