ਪੰਜਾਬ ‘ਚ ਵੀ ਆਉਣ ਵਾਲੇ ਸਮੇਂ ‘ਚ ਖਿੜੇਗਾ ਕਮਲ – ਨੱਢਾ

ਲੁਧਿਆਣਾ, 14 ਮਈ – ਭਾਜਪਾ ਦੇ ਰਾਸ਼ਟਰੀ ਪ੍ਰਧਾਨ ਜੇ.ਪੀ ਨੱਢਾ ਅੱਜ ਭਾਜਪਾ ਵਰਕਰ ਸੰਮੇਲਨ ‘ਚ ਹਿੱਸਾ ਲੈਣ ਲਈ ਲੁਧਿਆਣਾ ਪਹੁੰਚੇ। ਗਲਾਡਾ ਗਰਾਊਂਡ ‘ਚ ਵਰਕਰਾਂ ਦੇ ਠਾਠਾਂ ਮਾਰਦੇ ਇਕੱਠ ਨੂੰ ਸੰਬੋਧਨ ਕਰਦਿਆ ਜੇ.ਪੀ ਨੱਢਾ ਨੇ ਕਿਹਾ ਕਿ ਅੱਜ ਮੈਨੂੰ ਸ਼ਹੀਦ ਸੁਖਦੇਵ ਥਾਪਰ ਦੇ ਜਨਮ ਸਥਾਨ ‘ਤੇ ਜਾਣ ਦਾ ਸੁਭਾਗ ਪ੍ਰਾਪਤ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਸਮੇਂ ‘ਚ ਪੰਜਾਬ ਵਿਚ ਵੀ ਕਮਲ ਖਿੜੇਗਾ। ਚੋਣਾਂ ‘ਚ ਦੇਰੀ ਨਾਲ ਉਤਰਨ ਦਾ ਸਾਨੂੰ ਅਹਿਸਾਸ ਹੈ। ਵਿਰੋਧੀ ਪਾਰਟੀਆਂ ਨੂੰ ਲੰਮੇ ਹੱਥੀ ਲੈਂਦਿਆ ਜੇ.ਪੀ ਨੱਢਾ ਨੇ ਕਿਹਾ ਕਿ ਉੱਤਰ ਪ੍ਰਦੇਸ਼ ‘ਚ ਕਈ ਥਾਵਾਂ ‘ਤੇ ਕਾਂਗਰਸੀ ਉਮੀਦਵਾਰਾਂ ਦੀ ਜਮਾਨਤ ਜ਼ਬਤ ਹੋਈ ਹੈ ਜਦਕਿ ਉੱਤਰਾਖੰਡ ‘ਚ ‘ਆਪ’ ਉਮੀਦਵਾਰਾਂ ਦੀ ਜਮਾਨਤ ਜ਼ਬਤ ਹੋਈ ਹੈ। ਦੇਸ਼ ਦੇ 18 ਰਾਜਾਂ ‘ਚ ਇਸ ਸਮੇਂ ਭਾਜਪਾ ਦੀ ਸਰਕਾਰ ਚੱਲ ਰਹੀ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਮੋਦੀ ਸਰਕਾਰ 23000 ਬੱਚਿਆ ਨੂੰ ਯੂਕਰੇਨ ਤੋਂ ਦੇਸ਼ ਲਿਆਈ ਹੈ।