ਅੰਮ੍ਰਿਤਪਾਲ ਸਿੰਘ ਮਹਿਰੋਂ ਵੱਲੋਂ ਕੰਚਨ ਕੁਮਾਰੀ, ਉਰਫ ਕਮਲ ਕੌਰ ਭਾਬੀ ਦੇ ਕਤਲ ਮਾਮਲੇ ਵਿਚ ਇਕ ਸਕਾਰਪੀਓ ਕਾਰ ਦੀ ਸੀਸੀਟੀਵੀ ਫੁਟੇਜ ਸਾਹਮਣੇ ਆਈ ਹੈ। ਇਹ ਸਕਾਰਪੀਓ ਕਾਰ ਅੰਮ੍ਰਿਤਪਾਲ ਦੀ ਦੱਸੀ ਜਾ ਰਿਹਾ ਹੈ। ਇਸ ਸਕਾਰਪੀਓ ਦੇ ਪਿੱਛੇ ਕਮਲ ਕੌਰ ਭਾਬੀ ਦੀ ਕਾਰ ਦਿਖਾਈ ਦੇ ਰਹੀ ਹੈ। ਇਹ ਕਾਰ ਹਰਿਆਣਾ ਦੇ ਮਹਿੰਦਰਗੜ੍ਹ ਦੀ ਹੈ। ਇਸ ਦਾ ਨੰਬਰ HR34J 0012 ਹੈ ਜੋ ਮਹਿੰਦਰਗੜ੍ਹ ਦੇ ਇੱਕ ਵਿਅਕਤੀ ਦੇ ਨਾਮ ‘ਤੇ ਰਜਿਸਟਰਡ ਹੈ। ਅੰਮ੍ਰਿਤਪਾਲ ਸਿੰਘ ਮਹਿਰੋਂ ਨੇ ਇਹ ਕਾਰ ਮਹਿੰਦਰਗੜ੍ਹ ਤੋਂ ਖਰੀਦੀ ਸੀ। ਇਹ ਸੀਸੀਟੀਵੀ ਵੀਡੀਓ ਜੋ ਤੁਸੀਂ ਦੇਖ ਰਹੇ ਹੋ, ਲੁਧਿਆਣਾ ਮੋਗਾ ਹਾਈਵੇਅ ‘ਤੇ ਲੱਗੇ ਕੈਮਰੇ ਦੀ ਦੱਸੀ ਜਾ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਸਕਾਰਪੀਓ ਵਿਚ ਅੰਮ੍ਰਿਤਪਾਲ ਸੀ ਅਤੇ ਉਸ ਦੇ ਪਿੱਛੇ ਕਮਲ ਕੌਰ ਭਾਬੀ ਜਾ ਰਹੀ ਹੈ। ਦੱਸ ਦਈਏ ਕਿ ਕਮਲ ਭਾਬੀ ਕਤਲ ਕੇਸ ਵਿੱਚ ਨਾਮਜ਼ਦ ਅੰਮ੍ਰਿਤਪਾਲ ਸਿੰਘ ਮਹਿਰੋਂ ਭਾਰਤ ਛੱਡ ਕੇ ਸੰਯੁਕਤ ਅਰਬ ਅਮੀਰਾਤ (ਯੂਏਈ) ਚਲਾ ਗਿਆ ਹੈ। ਇਸ ਮਾਮਲੇ ’ਚ ਅੰਮ੍ਰਿਤਪਾਲ ਸਿੰਘ ਮਹਿਰੋਂ ਸਮੇਤ ਤਿੰਨ ਮੁਲਜ਼ਮ ਪਹਿਲਾਂ ਹੀ ਨਾਮਜ਼ਦ ਹਨ, ਹੁਣ ਪੜਤਾਲ ਤੋਂ ਬਾਅਦ ਪੁਲਿਸ ਨੇ ਦੋ ਹੋਰ ਵਿਅਕਤੀਆਂ ਨੂੰ ਮਾਮਲੇ ’ਚ ਨਾਮਜ਼ਦ ਕੀਤਾ ਹੈ। ਕਤਲ ਕੇਸ ’ਚ ਗ੍ਰਿਫ਼ਤਾਰ ਕੀਤੇ ਗਏ ਅੰਮ੍ਰਿਤਪਾਲ ਸਿੰਘ ਮਹਿਰੋਂ ਦੇ ਸਾਥੀ ਨਿਮਰਤਜੀਤ ਸਿੰਘ ਅਤੇ ਜਸਪ੍ਰੀਤ ਸਿੰਘ ਨੇ ਪੁਲਿਸ ਤਫ਼ਤੀਸ਼ ਦੌਰਾਨ ਕਈ ਅਹਿਮ ਖੁਲਾਸੇ ਕੀਤੇ ਹਨ। ਉਨ੍ਹਾਂ ਦੱਸਿਆ ਕਿ ਕੰਚਨ ਤਿਵਾੜੀ ਉਰਫ਼ ਕਮਲ ਕੌਰ ਭਾਬੀ ਨੂੰ ਕਤਲ ਕਰਨ ਤੋਂ ਪਹਿਲਾਂ ਮੁਲਜ਼ਮ ਤਿੰਨ ਮਹੀਨੇ ਲੁਧਿਆਣਾ ’ਚ ਰੇਕੀ ਕਰਦੇ ਰਹੇ। ਅੰਮ੍ਰਿਤਪਾਲ ਸਿੰਘ ਮਹਿਰੋਂ 8 ਜੂਨ ਨੂੰ ਕੰਚਨ ਦੇ ਘਰ ਗਿਆ ਅਤੇ ਉਸ ਨਾਲ ਕਾਰਾਂ ਦੀ ਪ੍ਰਮੋਸ਼ਨ ਲਈ ਬਠਿੰਡਾ ਜਾਣ ਤੇ ਕੰਚਨ ਦੀ ਕਾਰ ਦੀ ਮੁਰੰਮਤ ਕਰਵਾ ਕੇ ਦੇਣ ਬਾਬਤ ਗੱਲ ਕੀਤੀ। ਕੰਚਨ ਬਠਿੰਡਾ ਜਾਣ ਲਈ ਰਾਜ਼ੀ ਹੋ ਗਈ। ਨੌਂ ਜੂਨ ਨੂੰ ਅੰਮ੍ਰਿਤਪਾਲ ਸਿੰਘ ਮਹਿਰੋਂ, ਜਸਪ੍ਰੀਤ ਸਿੰਘ ਅਤੇ ਨਿਮਰਤਜੀਤ ਸਿੰਘ ਤਿੰਨੋਂ ਜਣੇ ਮੋਗਾ ਤੋਂ ਲੁਧਿਆਣਾ ਗਏ ਅਤੇ ਵਟਸਐਪ ’ਤੇ ਸੰਪਰਕ ਕਰਕੇ ਕੰਚਨ ਨੂੰ ਅਪੋਲੋ ਹਸਪਤਾਲ ਕੋਲ ਬੁਲਾ ਲਿਆ। ਬਠਿੰਡਾ ਪਹੁੰਚ ਕੇ ਕੰਚਨ ਦੀ ਗੱਡੀ ਨੂੰ ਮੁਰੰਮਤ ਲਈ ਗੈਰਾਜ ਵਿੱਚ ਲਾ ਦਿੱਤਾ। ਕਰੀਬ ਅੱਧੀ ਰਾਤ ਨੂੰ 12:30 ਵਜੇ ਕੰਚਨ ਦੀ ਗੱਡੀ ਦੀ ਮੁਰੰਮਤ ਮੁਕੰਮਲ ਹੋਈ। ਇੱਥੋਂ ਕੰਚਨ ਵਾਲੀ ਗੱਡੀ ਅੰਮ੍ਰਿਤਪਾਲ ਸਿੰਘ ਚਲਾਉਣ ਲੱਗਾ ਅਤੇ ਕੰਚਨ ਉਸ ਨਾਲ ਸੀ। ਨਿਮਰਤਜੀਤ ਸਿੰਘ ਤੇ ਜਸਪ੍ਰੀਤ ਸਿੰਘ ਸਕਾਰਪੀਓ ਗੱਡੀ ਉਤੇ ਸਨ। ਗੈਰਾਜ ਤੋਂ ਉਹ ਭੁੱਚੋ ਵੱਲ ਚਲੇ ਗਏ ਅਤੇ ਸਕਾਰਪੀਓ ਗੱਡੀ ਪੈਟਰੋਲ ਪੰਪ ’ਤੇ ਰੋਕ ਕੇ ਸਾਰੇ ਇੱਕੋ ਗੱਡੀ ’ਚ ਸਵਾਰ ਹੋ ਗਏ। ਇਸ ਦੌਰਾਨ ਅੰਮ੍ਰਿਤਪਾਲ ਸਿੰਘ ਨੇ ਕੰਚਨ ਤੋਂ ਉਸ ਦੇ ਆਈ ਫ਼ੋਨ ਅਤੇ ਟੱਚ ਸਕਰੀਨ ਫ਼ੋਨ ਖੋਹ ਲਏ ਅਤੇ ਪਾਸਵਰਡ ਪੁੱਛਣਾ ਸ਼ੁਰੂ ਕਰ ਦਿੱਤਾ। ਐੱਸਐੱਸਪੀ ਅਨੁਸਾਰ ਥੋੜ੍ਹੀ ਦੇਰ ਮਗਰੋਂ ਜਸਪ੍ਰੀਤ ਸਿੰਘ ਤੇ ਨਿਮਰਤਜੀਤ ਸਿੰਘ ਨੇ ਕੰਚਨ ਦੇ ਗਲੇ ’ਚ ਕਮਰਕੱਸਾ ਪਾ ਕੇ ਖਿੱਚਿਆ। ਅੰਮ੍ਰਿਤਪਾਲ ਸਿੰਘ ਮਹਿਰੋਂ ਨੇ ਕੰਚਨ ਦਾ ਗਲਾ ਘੁੱਟ ਦਿੱਤਾ ਤੇ ਉਸ ਦੀ ਮੌਤ ਗਈ।