ਪੰਜਾਬ ਸਰਕਾਰ ਨੇ ਪਹਿਲੀ ਵਾਰ ਡਾਕਟਰਾਂ ਲਈ ਸਟੇਟ ਐਵਾਰਡ ਐਲਾਨੇ ਹਨ। ਅੱਜ ਚੰਡੀਗੜ੍ਹ ਵਿੱਚ ਸੂਬਾ ਪੱਧਰ ਦਾ ਐਵਾਰਡ ਸਮਾਰੋਹ ਹੋ ਰਿਹਾ ਹੈ। ਜਿਸ ’ਚ ਮੁੱਖ ਮਹਿਮਾਨ ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਹੋਣਗੇ। ਪੰਜਾਬ ਦੇ ਵੱਖ-ਵੱਖ ਜ਼ਿਲ੍ਹਿਆਂ ’ਚੋਂ 40 ਸਰਕਾਰੀ ਡਾਕਟਰਾਂ ਦੀ ਸਟੇਟ ਐਵਾਰਡ ਲਈ ਚੋਣ ਕੀਤੀ ਗਈ ਹੈ ਅਤੇ ਚਾਰ ਐਵਾਰਡ ਮੈਡੀਕਲ ਸਿੱਖਿਆ ਵਿਭਾਗ ’ਚ ਵੀ ਦਿੱਤੇ ਜਾਣੇ ਹਨ। ਇਸ ਤੋਂ ਇਲਾਵਾ ਸਿਹਤ ਵਿਭਾਗ ਦੇ ਡਾਇਰੈਕਟਰ ਦਫ਼ਤਰ ਦੇ 7 ਉੱਚ ਅਧਿਕਾਰੀਆਂ ਨੂੰ ਸਟੇਟ ਐਵਾਰਡ ਮਿਲਣਗੇ। ਅੱਠ ਪ੍ਰਾਈਵੇਟ ਡਾਕਟਰਾਂ ਨੂੰ ਵੀ ਸਟੇਟ ਐਵਾਰਡ ਦਿੱਤਾ ਜਾਵੇਗਾ ਜਿਨ੍ਹਾਂ ’ਚ ਡਾ. ਵਿਸ਼ਵ ਮੋਹਨ, ਡਾ. ਜੀਆ ਰਾਜ, ਡਾ. ਵਰਿੰਦਰ ਸਿੰਘ ਤੇ ਡਾ. ਰਜਿੰਦਰ ਸਿੰਘ ਪਰਮਾਰ ਸ਼ਾਮਲ ਹਨ। ਸੂਚੀ ਅਨੁਸਾਰ ਡਾਇਰੈਕਟਰ (ਐੱਸ ਆਈ) ਡਾ. ਅਨਿਲ ਗੋਇਲ ਦੀ ਸਟੇਟ ਐਵਾਰਡ ਲਈ ਚੋਣ ਕੀਤੀ ਗਈ ਹੈ। ਡਾ. ਗੋਇਲ ਮਹਿਕਮੇ ’ਚ ਕਾਫ਼ੀ ਇਮਾਨਦਾਰ ਅਧਿਕਾਰੀ ਵਜੋਂ ਜਾਣੇ ਜਾਂਦੇ ਹਨ। ਮੁੱਖ ਦਫ਼ਤਰ ’ਚੋਂ ਸਹਾਇਕ ਡਾਇਰੈਕਟਰ ਡਾ. ਗਗਨਦੀਪ ਸਿੰਘ ਗਰੋਵਰ ਅਤੇ ਡਾ. ਰਾਜੇਸ਼ ਭਾਸਕਰ ਦੀ ਸਟੇਟ ਐਵਾਰਡ ਲਈ ਚੋਣ ਹੋਈ ਹੈ। ਜ਼ਿਲ੍ਹਿਆਂ ’ਚੋਂ ਮਿਲਣ ਵਾਲੇ ਸਟੇਟ ਐਵਾਰਡਾਂ ’ਚ ਬਠਿੰਡਾ ਦੇ ਡਾ. ਵਿਰੇਸ਼ਵਰ ਚਾਵਲਾ ਅਤੇ ਡਾ. ਅਰੁਣ ਬਾਂਸਲ, ਅੰਮ੍ਰਿਤਸਰ ਦੇ ਡਾ. ਸਤਿੰਦਰਜੀਤ ਸਿੰਘ ਬਜਾਜ ਤੇ ਡਾ. ਰਸ਼ਮੀ ਵਿੱਜ, ਫ਼ਰੀਦਕੋਟ ਜ਼ਿਲ੍ਹੇ ਦੇ ਡਾ. ਪੰਕਜ ਬਾਂਸਲ ਤੇ ਡਾ. ਵਿਸ਼ਾਲ, ਪਟਿਆਲਾ ਦੀ ਡਾ. ਨੇਹਾ ਤੇ ਡਾ. ਗਗਨਦੀਪ ਕੌਰ, ਸੰਗਰੂਰ ਦੇ ਡਾ. ਇੰਦਰਮਨਜੋਤ ਸਿੰਘ ਅਰੋੜਾ ਤੇ ਡਾ. ਪਿੰਦਰਵੀਰ ਸਿੰਘ, ਤਰਨ ਤਾਰਨ ਦੀ ਡਾ. ਨੀਰਜ ਲਤਾ, ਗੁਰਦਾਸਪੁਰ ਦੇ ਡਾ. ਪ੍ਰਭਜੋਤ ਤੇ ਡਾ. ਪ੍ਰਿਆਜੀਤ ਕਲਸੀ, ਪਠਾਨਕੋਟ ਦੀ ਡਾ. ਪਰਵਿੰਦਰ ਕੌਰ ਤੇ ਡਾ. ਮਾਧਵੀ ਅਤੇ ਮੁਕਤਸਰ ਦੀ ਡਾ. ਲਖਬੀਰ ਕੌਰ ਆਦਿ ਨੂੰ ਵੀ ਭਲਕੇ ਸਟੇਟ ਐਵਾਰਡ ਦਿੱਤਾ ਜਾਵੇਗਾ।