ਝਾਰਖੰਡ – ਬੱਸ ਤੇ ਕਾਰ ਦੀ ਟੱਕਰ ਤੋਂ ਬਾਅਦ ਲੱਗੀ ਅੱਗ ‘ਚ ਜ਼ਿੰਦਾ ਸੜੇ 5 ਲੋਕ

ਰਾਂਚੀ, 15 ਸਤੰਬਰ – ਝਾਰਖੰਡ ਦੇ ਰਾਮਗੜ੍ਹ ਜ਼ਿਲ੍ਹੇ ‘ਚ ਹੋਏ ਭਿਆਨਕ ਸੜਕ ਹਾਦਸੇ ਵਿਚ 5 ਲੋਕ ਜ਼ਿੰਦਾ ਸੜ ਗਏ। ਰਾਜਰੱਪਾ ਥਾਣਾ ਖੇਤਰ ਦੇ ਮੁਰਬੰਦਾ ਲਾਰੀ ਨੇੜੇ ਅੱਜ ਸਵੇਰੇ ਇੱਕ ਬੱਸ ਅਤੇ ਕਾਰ ਦੀ ਟੱਕਰ ਹੋ ਗਈ, ਜਿਸ ਤੋਂ ਬਾਅਦ ਦੋਵਾਂ ਵਾਹਨਾਂ ਨੂੰ ਲੱਗੀ ਅੱਗ ਵਿਚ ਕਾਰ ਸਵਾਰ 2 ਮਹਿਲਾਵਾਂ ਅਤੇ ਇੱਕ ਲੜਕੇ ਸਮੇਤ 5 ਲੋਕਾਂ ਦੀ ਜ਼ਿੰਦਾ ਸੜਨ ਨਾਲ ਮੌਤ ਹੋ ਗਈ। ਇਸ ਹਾਦਸੇ ਵਿਚ ਅੱਗ ਲੱਗਣ ਕਾਰਨ ਬੱਸ ਵੀ ਨੁਕਸਾਨੀ ਗਈ ਹੈ ਹਾਲਾਂਕਿ ਬੱਸ ਵਿਚ ਸਵਾਰ ਯਾਤਰੀ ਸੁਰੱਖਿਅਤ ਦੱਸੇ ਜਾ ਰਹੇ ਹਨ। ਹਾਦਸੇ ਸਮੇਂ ਬੱਸ ਧਨਬਾਦ ਤੋਂ ਰਾਂਚੀ ਜਾ ਰਹੀ ਸੀ ਜਦਕਿ ਕਾਰ ਰਾਮਗੜ ਤੋਂ ਬੋਕਾਰੋ ਜਾ ਰਹੀ ਸੀ ਕਿ ਮੁਰਬੰਦਾ ਲਾਰੀ ਨੇੜੇ ਦੋਵਾਂ ਦੀ ਆਹਮੋ ਸਾਹਮਣੇ ਟੱਕਰ ਹੋ ਗਈ। ਸਾਰੇ ਮ੍ਰਿਤਕ ਬਿਹਾਰ ਦੇ ਦੱਸੇ ਜਾ ਰਹੇ ਹਨ।ਪ੍ਰਤੱਖ ਦਰਸ਼ੀਆਂ ਅਨੁਸਾਰ ਹਾਦਸੇ ਤੋਂ ਬਾਅਦ ਕਾਰ ਦਾ ਦਰਵਾਜ਼ਾ ਨਹੀਂ ਖੁੱਲ੍ਹ ਰਿਹਾ ਸੀ ਜਿਸ ਕਾਰਨ ਕਾਰ ਸਵਾਰ ਲੋਕ ਜ਼ਿੰਦਾ ਸੜ ਗਏ।