ਅਮਰੀਕਾ ‘ਚ ਟਰੇਨ ਦੇ ਪਟੜੀ ਤੋਂ ਉਤਰਨ ਕਾਰਨ 3 ਮੌਤਾਂ-ਕਈ ਜਖਮੀਂ

ਵਾਸ਼ਿੰਗਟਨ, 26 ਸਤੰਬਰ – ਅਮਰੀਕਾ ਦੇ ਸਿਆਟਲ ਤੋਂ ਸ਼ਿਕਾਗੋ ਜਾ ਰਹੀ ਟਰੇਨ ਦੇ ਪਟੜੀ ਤੋਂ ਉਤਰਨ ਕਰਕੇ 3 ਲੋਕਾਂ ਦੀ ਮੌਤ ਹੋ ਗਈ ਜਦਕਿ ਕਈ ਲੋਕ ਜਖਮੀਂ ਦਸੇ ਜਾ ਰਹੇ ਹਨ। ਐਮਟ੍ਰੈਕ ਕੰਪਨੀ ਦੀ ਇਹ ਟਰੇਨ ਸ਼ਨੀਵਾਰ ਨੂੰ ਸਿਆਟਲ ਤੋਂ ਸ਼ਿਕਾਗੋ ਲਈ ਨਿਕਲੀ ਸੀ ਕਿ ਉੱਤਰ ਮੱਧ ਮੌਂਟਾਨਾ ਵਿਖੇ ਪਟੜੀ ਤੋਂ ਉਤਰ ਗਈ। ਕੰਪਨੀ ਦੇ ਬੁਲਾਰੇ ਨੇ ਦੱਸਿਆ ਕਿ ਜਿਸ ਸਮੇਂ ਇਹ ਹਾਦਸਾ ਹੋਇਆ ਟਰੇਨ ਵਿਚ 147 ਯਾਤਰੀ ਸਵਾਰ ਸਨ ਜਦਕਿ ਚਾਲਕ ਦਲ ਦੇ 13 ਮੈਂਬਰ ਸਨ। ਇੱਕ ਯਾਤਰੀ ਨੇ ਦੱਸਿਆ ਕਿ ਟਰੇਨ ਦਾ ਇੱਕ ਡੱਬਾ ਪਟੜੀ ਤੋਂ ਉਤਰ ਕੇ ਪੂਰੀ ਤਰਾਂ ਪਲਟ ਗਿਆ ਜਦਕਿ ਦੂਸਰਾ ਉਸ ਦੇ ਉੱਪਰ ਆ ਚੜਿਆ। ਇਸ ਤੋਂ ਬਾਅਦ 3 ਹੋਰ ਡੱਬੇ ਪਟੜੀ ਤੋਂ ਹੇਠਾਂ ਉਤਰ ਗਏ ਤੇ ਟਰੇਨ ਤੋਂ ਅਲੱਗ ਹੋ ਗਏ।